عندما يأتى المساء

عندما يأتى المساء ..الناس كلها بتنام
عندما يأتى المساء ..ناديه بتضرب ابنها عشان يعمل الواجب
عندما يأتى المساء ..ام محمد بتاخد العيله عشان يزوروا نسايب ابنها
عندما يأتى المساء ..زينب هتنزل من بيت ستها تودى شهريتها لامها واخواتها البنات
عندما يأتى المساء..هيجى ابو العيال بأكلة كباب لزوم العَشَا
عندما يأتى المساء ..هيخرج إسماعيل كالعادة مطوح من الغُرزه
عندما يأتى المساء..هيقعد الحاج ابراهيم فى خلوته يصلى ويستغفر ويدعى لابنه بالتوبه وانه يخرج من السجن
عندما يأتى المساء ..هيزور عم جورج مرات احمد زى مهو متعود يزورها كل اسبوع بعد مجوزها استشهد فى غرق العبارة
عندما يأتى المساء..الست فاطمه هتودى طبق كحك وبسكوت لحبيبتها وجارتها ..ام مينا
عندما يأتى المساء.. دى ليلة العيد لازم اسامه يقضيها وياريت لو في موزه فى السريع عشان يلحق صلاة العيد
عندما يأتى المساء..هتروح نرمين هى وصحباتها فى الكليه دار الأيتام، وحشوها قوى من الاسبوع اللى فات
عندما يأتى المساء ..احمد بيفكر الساعه كام هيكلم منى عشان يقولها كل سنة وانتى طيبه ..يا حبيبتى
عندما يأتى المساء..سمير هياخد فلوس الذكاة اللى وعد امه يخرجها ويروح مكانه المفضل..يشرب وينسى
عندما يأتى المساء ..هتنام مريم وهى بتحلم ببابا نويل ..هيجبلها عروسه؟لا هى عايزة رجلين زى اللى كانت عندها !!
عندما يأتى المساء ..هتنزل منال بعد مالكل ينام عشان تقابل سيد ويهربوا سوا
عندما يأتى المساء..هتقعد الحاجه صبحيه مع بنات ولادها يتفرجوا على المسلسل ويقزقزوا لب
عندما يأتى المساء ..فرح محمد على مراته التالته بعد جوازتين وست بنات ..ويارب ولد
عندما يأتى المساء ..خرج عم فاروق يصلى العشاء بص قدامه لقى صاحب عمره بعد غياب عشرين سنه اخده بالحضن ..ومات
عندما يأتى المساء ..الاستاذ وليد هياخد مراته يوصلها بعربيته شغلها اصل شغلها متعوده دايما...يكون بليل
عندما يأتى المساء ..زى مخططت سماح ..هتخلص من جوزها وترتاح منه ..للأبد
عندما يأتى المساء ..هيرجع ابن سميه ليها بعد فراق سنين وقواضى ومحاكم ..يا ترى هيفتكرها؟
عندما يأتى المساء ..القمر هيطلع والسما هتبقى سواد وايناس فى الدور الاخير واقفه تبص للقمر وتقول : يا ترى لسه فاكرنى؟
عندما يأتى المساء .. كل البشر فى احوال ..وانا قاعده بكتب حال من مليون حال

عندما يأتى الصباح ..مدارس ومشاغل وبرودة وفطور وفول واشياء آخرى

كنت دايما بقول انى لقيت فيه اللى ملقتوش فى فى...فى حد مينفعش ميكونش يحمل الا المشاعر دى ، بس احنا مبنختارهمش مختارتش ابويا لكن حسيت معاه انه ابويا اللى بيحن عليا ويسأل ويطمن ويخاف ..حاجات افتقدتها ومش هخبى عليكم
انا مكنتش جايه اكتب ..كنت بدخل فى سكوت مدونتى ابص عليها نظرة يائس وامشى ..لكن بعد مصلحت الكمبيوتر قولت اشوف الناس اول حد - كالعادة - بدخل ادور عليه كان بابا ..ولما اقول بابا يبقى يوم حفلة توقيع العدد الاول من مدونات مصريه للجيب لما قولتله يا بابا انا عايزاك تيجى ولما لقيته ، ولما واحد معرفوش شافنى وانا بسلم عليه وواقفه جمبه وبيسألنى ده والدك بجد؟ بدون تردد قولت اة ده والدى
ايوة ده ابويا لانه حسسنى بكده ، ومش انا بس

انا عايزة يا بابا اقولك حاجه ويارب بجد تشوفها ..انا عارفه انى زعلتك قبل كده بس انا كمان عارفه انك قلبك طيب وكبير وبتحبنى وبتحب كل الناس
بجد سامحنى لو كنت انا اللى خليتك تبعد ،بس بجد ارجع عشان فعلا انت حسك بس بالدنيا عندنا ، انا مش عارفه اوصلك ولا عارفه اكلمك
وفعلا حسه انى محتاجه اكلمك ، محتاجه ارجع زى الاول واكيد محتاجه مساعدتك لده

اعذرنى وسامحنى ان كلامى وكلام الدنيا ميوفيش الاحساس اللى شيفاه فى كلام الناس ولا كلامى
عايزة بس اطمن على حضرتك

كيف ترتقى ادبياً...؟!!

مقدمه لابد منها ضرورى اوى خالص """"

ازيكم ...وحشتونى قوى ..طبعا انا ظروفى لسه زى مهى لكن انا وسبحان الله جاتلى قوة وطاقه غريبه جدا على حالتى دى ..فعلا صدق اللى قالى من غير ميعاد ان خروجى من اللى انا فيه بأيدى انا ورغم انى لسه زى مانا ، بس حسيت بقوة الكتابه جوايا وحاجات كتير عايزة تخرج وعليه قررت انا المدعوة عيلة مفتريه سابقا ان انزل بتتر ..اقصد موضوعات هى ممكن تكون مقالات ساخره وممكن رغى بينى وبينكم فى السياسه - اللهم اكفينا شرها- بس الاكيد ان اسمها " ماشية مره " ، ودى اول حاجه تانى حاجه بقى حاجه كده ميتقالش عليها الا " حوار مع الحمار " ومسمعش اى تعليق
حوار مع الحمار هينزل كل اسبوع بأذن الله وبردو هو نوع من انواع الكتابه الساخره عشان بس منخبطش فى حد ونتعلق ولا كده لالالالا اما ماشيه مره فدى هتكون موجوده بحظوظها

كده المقدمه خلصت ....وعلى فكرة ملهاش دعوه نهائى باللى جاى ورا ...!!!!

................................

ازاى اكون راقيه ادبيا ؟؟!!! متعرفوش السؤال ده راودنى قد اية ..يمكن لانى لما فتحت عينى على نور الاوضه لقيت ان ده نور ربنا والفجر اذن من زمان ، يمكن لانى لما حاولت جاهده مستميته متشعلقه فى ميكروباز انى اعرف ازاى اكون راقيه ادبيا من اى حد من كبار الادباء والمثقفين والمعروفين دوليا على مستوى قصور الثقافه فى النجوع والمراكز والكفور وبردو مطلعتش منهم بإجابه واضحه وصريحه

واحكيلكم موقف

كنت فى يوم من الايام الصيفيه اللى كانت دايما تبقى مفعمه بالنشاط الثقافى ولان المثقفين فى جميع انحاء الاقاليم المصريه بيجتمعوا فى مؤتمر للادباء قولت اتشعبط على اول ميكروباظ واروح اتثقف واتعلم وانشكح وسطهم مهما بردو عزوتنا ، المهم طق فى دماغى السؤال

انا : احم احم ..استاذ معقد ممكن اعرف ازاى اكون راقيه ادبيا ؟

استاذ معقد : انتى يا انسه محتاجه على عمرك عمر تانى لتفهمى اساسا معنى سؤالك ده ..يا انسه انتى مش شايفه جبهزت الشعراء والمثقفين انتى لازم الاول تقفى وراهم وتسمعى لهم وتتعلمى يمكن تفهمى معنى سؤالك

انا بلاماضه :هو حضرتك يا فندم مينفعش الجيل الجميل ده يعلمنا بردو اهو يكسب فينا ثواب

استاذ معقد :سواب ايه يا انسه انتى ...وعلى العموم بعد الغذاء بأذن الله هقولك

وطبعا الغدا جر عشا وانا فضلت استنى اجابه لسؤالى كيف ارتقى ادبيا ،بس طبعا انا مفضلتش ساكته على حالى كتير قولت مادام الكبار محتكرنها يبقى انا لازم بردو اشغل جمجمتى
وعليه - امسكوا ورقه وقلم - ونبدأ فى معرفة كيف ترتقى ادبيا
نمبر 1 ..كل اللى يقع تحت ايدك يا معلم تقراه ..متقوليش ده مبفهموش ..متقوليش ده لغة فارسى ..حاول تثقف نفسك وتمنجه نفسك انا مبهزرش لازم تكون عارف كل كبيرة وصغيره ولو مش عارف مَثل يا سيدى
نمبر 2 ..بأى شكل من الاشكال البس نضارة نظر ويا سلام بقى يا بوب لو تبقى كعب كبايه ..صدقنى هتوصل للارتقاء فى ثانيه
نمبر 3..تبقى ماشى فى الشارع يا معلم وايدك شايله ايشى جرايد وايشى كتب ..لازم تبين السقافه هيقولوا عليك علم من اعلام الجولوجيا صدقنى
نمبر 4..احنا طبعا فى شهر رمضان والناس بقى شغاله موائد رحمان ..سيادتك تنمر على مائدة الرحمن بتاعت اى اديب مشهور او كاتب وترشق فيها ولونهم قليلين يا حسره
نمبر 5 ..حاول على قد متقدر متسمعش ولا كلمه من كلامى ده ..لان كلامى ده هيخليك ....ولا بلاش هبقى اقولك فى حوار مع الحمار

اولا
كل سنة وانتم طيبين
ثانيا
انا مش عارفه اقول ايه ، احنا فى شهر فضيل ،انا جايه اخنق على الناس فى وقت زى ده
كنت ناويه اكتب واحكى عن ذكريات شهر رمضان
لكن
مش هقدر اقول الا انى بمر بظروف مش هقدر معاها اكتب شئ
غصب عنى
لانى بحب مدونتى دى جدا وبحب اصدقائى هنا
وبحب اللى بيجاملونى لما بكتب كلام اهبل ، وبحب اللى بيشجعونى ، وبحب مفتريه وعيله
بس سامحونى
سامحونى قوى قوى
ظروفى اصعب منى
هاجى كل شوية ابص هنا
بس مش هقدر اكتب

منى واحمد....ومحطة القطر ...2

*منى تجلس القرفصاء وهى فى حالة من الهم والهزيمه رافعه شعار " لا للقطار بعد اليوم" ..واخذت تنوح بـ

منى: البكا والنوح عليك يالي
سرقت الفرح والهنا
عشـــــــت حيــاتي
أنت اللى فاضلي

منى وبعد أن ازداد عليها الهم والبكى والنوح ..
منى لنفسها :تعاليلى يامه الحقينى ..يعنى كان لازم القطر يعنى..هو انا ليه حسه انى النحس آه يانى يامه
*على الحال ده فضلت منى تنوح ..تتلفت شمال ويمين هداها منظر زوجين عصفورين ماسكين فى ايدين بعض الاتنين سوا سوا
منى لنفسها: آه يا احمد ..مش لو كنا اتجوزنا كان زمننا حلويين كده.. انا يا احمد انا تسيبنى وتجوز بسنت بنت البواب اكمن جالها عقد عمل فى ابو ظبى ...آه يانى يامه
منى لنفسها فى حالة حصره :ايه ده يا اخواتى جوز عصافير دول ولا جوز يمام ...شوفتى يابنتى ماسك ايدها ازاى كأنه مكلبش قلبها ..خايف تروح منه
آه ياليت الشباب يعود يوماً...كنت كلبشته

*****************

على اول الطريق كان احمد يسير مع سناء ..

أحمد : سناء ابوس ايدك مش هنا الفضايح دى عايزين نركب القطر خلى السفريه دى تعدى على خير
سناء تحاول تخليص يدها من احمد: طيب سيب ايدى مش هصوت قدام الناس
احمد يستعين بذراعه حول رقبتها: انتى كمان عاوزة تصوتى !!هو انا ماسك ايدك عشان هتصوتى...يا وليه مش قولتى عاوزة تقلعى الجزمه
سناء تحاول الجلوس على الرصيف :تعبت قعدنى هولد يا ناس الحقونى

احمد يرفعها من رقبتها ويثبت رأسها برأسه وهو يجز على سنه :بطلى فضايح يا وليه هتلمى الناس علينا خلاص قربنا

اما منى فكانت فى دنيا تانيه...

منى وهى تجلس فى حاله من البلاهه والانبهار: آه مش قادره لا ..لسه فى ناس بتحب بجد دخ عايز يشيلها ..شايفه يا بت يا منى بيقرب منها ازاى يا كزوفى يانى
الله الله ..ده بياخدها بالحضن يالهوى على الحب يالهوى ..امتى يا مون مون تحسى بكده

شخص ما : الموبيل يا ابله

منى : انا مش بتاعت موبيلات يا عمو

عمو ده : امال حطالنا يافطه ليه

منى : عشان محفظتى ضاعت وأنـ..

العمو بردو : الله يسهلك

منى : الله العصفورين راحو فين؟!!!

***************************

فى هذا الوقت كان احمد وسناء يـ....

احمد : انتى يا وليه هتمشى بالتى هى احسن ولا افجر نفسى واجبلك مصيبه

سناء : ليه يا اخويا شايفنى الامريكان ...متفجر بس بعيد عنى

احمد وقد احمر غيظا : اللهم طولك يا روح ...يا وليه انتى بتعملى فيا كده ليه امال لو مكنتش واخدك عن حب ومرمطه اربع سنين قبل الجواز

سناء وهى بتجر ناعم : مانا يا احمد بولد وانت تاعبنى

احمد : مش انتى إلي قولتى اروح لامى ...كمان يا بنت الناس الكومل انتى مش فى الخامس

سناء : لأ السابع ..وبطل تجرنى زى الجاموسه كده وامسك ايه بحنيه شويه الله

احمد بقرف ولوى بوز : طب امشى يا سناء ربنا يهديكى ، شايفه البت اللى قاعده بتشحت دى هقعدك جمبها

سناء : وهدخلنى الحمام ؟

احمد : اه هدخلك

اما منى ...

منى : الله العاصفير جايه عليا ...شايفه يا مونى ماسك ايدها بحنيه ازاى ...آآه يا حلاوة الحب ...!!

يتبع ..

***************

ملاحيظ

كل سنة وانتم طيبين وبخير وسعادة ، والى الله اقرب واتقى

اللهم بلغنا رمضان اللهم آمين

رمضان كريم يا اخواتى ..قريبا هكتب موضوع عن رمضان كل واحد يجهز ذكرياته معاه

الكارثه !!!

تحديث
****
من خمس دقايق كملت خمسه وعشرين سنه ..لوحدى..اتنين من اصدقائى رنوا عليا -كأنهم بيقولوا كل سنة وانتى طيبه- واحد بس اتصل قالى كل سنة وانتى طيبه ، ودلوقت انا لوحدى
************

والله كنت هنزل بوست تانى ، بس واضح ان البوستات الشخصيه هتكتر هنا وماله يعنى مدى مدونتى بردو يا جدعان والواحد اهو يقول الكلمتين اللى واقفين فى زورو

*******

عيد ميلادى ..دايما كنت بشوف ان اليوم ده من اكتر الايام سوادا فى حياتى ، لازم يحصل فيه كارثه ..وممكن مصيبه بردو ميضرش بس هنقول ايه ..حكمة ربنا ، انا مش معترضه على اليوم بس مش غريبه يعنى لما اقعد خمسه وعشرين سنه كل لما يجى اليوم ده ياما حد يموت ياما انا يحصلى حاجه ، وممكن والله المكان اللى اروح فيه اليوم ده يتفجر...يمكن حكمة

*******

كان زمان المفروض انى الوحيدة ما بين اخواتى اللى يتعملها عيد ميلاد ، والمفروض ان العيد ميلاد ده بيبوظ على آخر لحظه ..مش بقولكم

*******

ممممم الذكريات بتاعت عيد ميلادى دى غريبه قوى ، افتكر اول هدية جاتلى فى عيد ميلادى كان وانا عمرى 11 سنة كان من ابن الجيران وكان دبدوب ،تعرفوا بدون تريقه انا مش فاكره الولد ده خالص كل اللى فاكراه انه كان جارى واسمه محمد المشكلة انى مش لاقيه الدبدوب ده!!

*******

ايام الدراسه بالذات فى فترة الدراسة الجامعيه المهلبيه كنت عامله كتيبه جنود للحمايه على حقوق المرأة من التوحد الفكرى والانبعاث اللا شعورى الذكورى ، وكانت الكتيبه فى اليوم المقدس - عيد ميلادى - بيهربوا فى اى حته ، أقصد كانوا بيجبولى هدايا تصوروا انا محبتش افرط فى اى حاجه من الذكريات دى

*******

فجأه من كام يوم لقيتنى بطلع كل الهدايا دى وبقلب فيها لقيت حاجات كتير قوى ، ازاى انا كنت راكنه الذكريات دى كلها فى درج ، قريت كلام يضحك ويبكى ..افتكرت

*******

ايام الكليه كنت عامله زى شيخ الحارة وانا طالعه المدرج كنت بلاقى ناس كتير تسلم وتتكلم لدرجة انى مكنتش بلاقى مكان ، بس بعد مخلصت اكتشفت انى مكنتش اعرف غير تلات بنات بس

*******

واحده من صحباتى بتشتغل حاليا مدرسه - دى اخر حاجه انا سمعتها عنها- اه متستغربوش بعدنا عن بعض جدا وده كان بالتدريج واظن معظمنا ممكن يكون مر بده او يمكن انا مش عارفه ، التانيه اتجوزت فى دمياط -بلد والدها- اما التالته بقى فبتشتغل فى الغردقه

*******

ذكرياتى عن عيد ميلادى قليله جدا ومش عارفه ليه مش بحس بقيمته زى مبشوف فى عيون الناس ، سامحونى ان البوست لتانى مرة على التوالى شخصي

*******

معلش مدونتى بقى وببرطع فيها شوية وعيد ميلادى كمان ..الله

زعلانه !!!

زعلانه

منى؟!!

ايوة

طب استنى بس انتى مين

انا الاتنين

الله ، طب وانا مين بقى

انتى الواحد اللى فينا

طب قوليلى زعلانه ليه ومن ايه

زعلانه عشان ابتديتى تدخلى تانى القمقم ، ابتديتى تحاولى تانى تبعدى ، تقدرى تقوليلى انتى عايزة ايه دلوقت ،فى ناس كتير بتحبك وبتحترمك وانتى مش مقدراها ..بتحاولى تبعدى عنهم وتسيبهم وبس ال ايه خايفه منهم طب جربتيهم؟ عرفتيهم؟ ولا هو مجرد كلام فاضى حطاه فى دماغك وخلاص

الله الله .. استنى بس عليا بتعملى كده ليه ،انا مغلطتش ، انا بطبعى لوحدى بطبعى كده ، اة انا بهزر وبضحك ودمى خفيف ويبان انى اجتماعيه بس فى الاساس انا لوحدى

حتى لو انتى كده انتى اللى ساعيتى يكون ليكى حد وفعلا بقى ليكى وارتبطتى بيهم قوى وحبتيهم ، يبقى تزعليهم؟

لا طبعا انا عارفه انى غلطت ، بس كمان هما غلطوا فى حقى ، مفهمونيش لا ده كمان مفهمونيش صح

حتى لو كده مش تديهم فرصه يعرفوكى؟ مش انتى بتحبيهم وعايزة تبقى وسطهم؟

ايوة وربنا اعلم باللى فى قلبى نحيتهم

خلاص يبقى اتفاقنا يلا صالحيهم وقوليلهم انك بتحبيهم قوووووووووى وعايزة تبقى معاهم على طوللللللللللل

طيب مبلاش ننزل البوست ده ونزل بوست احمد ومنى وسناء

وبعدين؟ احنا قولنا ايه ..كمان انتى عارفه انى عايزة انزل بوست الصدمه

لا بس انا عايزة اكمل موضوع العنوسه

يا بنتى ونسيتى موضوع مثلث برمودا؟

مقولتيش كمان بالمرة ليه على الكومنت بتاع رئيس الوزرا عند على اسم مصر

شششششششششش..انتى هتتمحكى يلا اتفضلى قولى الكلمتين اللى عامله عليهم كل الكلام ده

اخوانى المواطنون ..احم احم..انا بجد بحبكم جدا واسفه لو كنت زعلت اى حد ..وياريت اللى يدخل يقول للى زعلتهم يجوا يسمعونى

كان محشور فى زورنا الكلام ده ...بنحبكم قوىىىىىى

خلصت الواجب

مممممممممم

وماله ميضرش انا زمان كنت باخد واجب قليل يعنى ، اهو نحله ولون الناس زمنها زعلانه مننا ، بس بردو لازم نحيي الناس بتاعت الوجبات دى

المهم من غير رغى لانى مش فايقة للرغى خالص الايامدى وصلنى وجبات وحاجات كده عمرى مشوفتها ال ايه المفروض نحلها قولنا نحلها

الاول كان من البت نعكشه المنعكشه دى واجب من زووووووومان وبعتته تانى عاشقة الحب قولت لازم اكرمهم

ونحل ونقول ...

6 أسرار قد لا يكتشفها من يقابلك أول مرة ؟

قوانين الواجب:( حتى هنا فى قوانين ..حسبى الله ونعم الوكيل )

. أذكر اسم من طلب منك حل هذا الواجب؟

اختشى وحبيبتشى نعكوشه ، والجميله عاشقة الحب

أذكر القوانين المتعلقة بهذا الواجب؟

ده شغل نيابه بقى ...

تحدث عن ستة أسرار قد لا يكتشفها من يقابلك للمرة الأولى؟

ممممممممم ، تصدق ممكن انا نفسياتى معرفش

طيب نحاول

1- انا غيووووووووووووورة جدا جدا وده على كل شئ مش متعلقه بحد معين او مكانه معينه يعنى حتى على صديقاتى وامى واخواتى

2- بحب لعب الاطفال بشكل مجنون الارنوب وتويتى وسارة ودبدوب ، تقريبا مكتبى مليان لعب واللى يجيي جمبهم :@

3-انا عصبيه جدددددددددددا بحرق دمى بسرعه بشكل فظيع يعنى وبكشر وبضايق وبحتد وفى الاخر ..قلبى ابيض بنسى قوام

4- متسرعه ..وبحاول امسك نفسى لان ساعات التسرع ده بيودينى فى داهيه ..همتكم معايا

5-اللى اول مرة يشوفنى مش هيعرف انى عندى فضول لحاجات غريبه ومؤمنه قوى بمثل اليابانى الصينى اللى هو تبع الناس اللى عنيهم ديقه.. اللى بيقول ادينى صنارة يابنى اصطاد بدل متدينى السمكه ..وانا بقى فضوليله فى الصياده

6- مجنونه بمعنى الكلمه :D .. ومؤمنه جدا ان الجنون طريق للسعادة ، وبردو مؤمنه انه مش كل الحياة ولازم يكون هناك قطرة من العقل

حول هذا الواجب إلى ستة مدونين،وأذكر أسماءهم مع روابط مدوناتهم في موضوعك.

مممممممممم ، الطيب احسن اللى عايزو ياخدو

****************************

تاج بقى جالى من سمسم الحلو العبقرى ده وبصراحه التاج جذبنى جدا انى اعمله

أولاً:سبع حاجات نفسى اعملهم

1- نفسى اروح عمرة او حج انا وامى
2-نفسى احس انى وصلت اخواتى لبر الامان بالذات اخويا الصغيرخالص
3- نفسى انزل اول مجموعه قصصية ليا بقى
4- نفسى اسمى اولادى يوسف ومريم مش عشان موضه ولكن حبا فى الاسماء دى فعلا
5-نفسى قبل مسمى اولادى يرزقنى ربنا براجل يتقى الله فيا ويكون نعم الزوج ، مش زى بتوع اليومين دولن
6- نفسى اكمل الدراسات العليا بقى واخد الماجيستير والدكتوراه
7- نفسى اخد دراسات حره فى العزف على الجيتار انا بحب الالة دى فعلا

ثانياً:سبع حاجات ماعرفتش اعملهم

1- معرفتش اكمل فى كلية حقوق زى مكنت بتمنى
2- مش عارفه ومعرفتش اخس إلى الآن ( محدش يتريق :@)
3-مش عارفه اعمل العمليه بتاعت مناخيرى الى الآن ...:cry
4- معرفتش الى الآن ارفع الظلم عن اى مخلوق حتى انا لما اتعرضتله
5-معرفتش انمى كل هواياتى زى الكتابه لانى فعلا متعددة الهوايات
6-معرفتش احب بجد او اتحب بجد
7- معرفتش ومش عارفه اكون مضحكه :cry

ثالثاً:سبع حاجات باقولها دايماً

ههههههههههههههههههه ، لازمه يعنى ماشى

1- السلام عليكم
2-بصى بقى
3-اودو ( دلع اخويا الصغير )
4-حاضر يا ماما
5-سلامى
6-نضارتى فين ( الايامدى بس )
7- اللهم لا تؤاخذنا بما فعله السفهاء منا

رابعاً:سبع مشكلات فى حياتك ممكن تحلهم الفلوس

بصوا بقى هى مش مشكلات بس حاجات تحلها الفلوس ، لان الفلوس مبتحلش مشاكل
1- اطلع انا وماما الحج
2- اسافر وألف العالم ، انا بحب السفر جدا
3- اشترى كميات كتب رهيبه وكمان لوحات اصليه
4- اتعلم العزف على الجيتار واشتريلى جيتار ليا
5-اخس طبعا مالرجيم والحاجات دى بتحتاج فلوس ( وعزيمه وارادة )
6-اتعلم السواقه واجيب عربيه لانى نفسى بجد اتعلم السواقه
7- اعمل لكل اخ من اخواتى مشروع خاص بيه

خامساً:سبع أماكن بحبهم

1- شط البحر
2- بيتنا القديم قوىىىى
3- مكتبتى
4- سريرى
5- بيت الارانب حبايبى
6-المناطق الخضرا والواسعه
7-راس البر زمان

سادساً:سبع اشخاص بحبهم غير بابا وماما واخواتى

السؤال ده مينفعش اذكر فيه سبعه ، فيه ناس موجوده دلوقت وفى ناس مش موجوده وبردو ليهم مكانه
يبقى مينفعش صح ؟

سابعاً:سبع حاجات بحبهم قوى

1- الارانب
2-سندوتش ماجنوم مؤمن
3- الكمبيوتر
4- الكتاب بكل انواعه
5- الجيتار
6- فرشة الرسم وقلم الفحم
7- لعبى وعروساتى ودباديبى

ثامناً:سبع مدونات بتحب تقرالهم

1- بابا ابو خالد
2- عايزة اتجوز
3- جبهة التهييس الشعبيه
4- عم احمد سو العجوز
5- البشمهندس محمد داوود بلدياتى
6- مدونتى انا طبعا :P
7- نعكشه
وعلى فكرة فى كتير بس هما قالوا سبعه
انا بجد بحب اقرأ لكل اللى فى الليست وده عن اختيار يعنى

التاج بمرره

ليكوريكا
نعكشه
لشفقه هانم واحسان بيه
اهو ده عيبه
ومحمد داوود
اوتار نهر الحب
وكل الناس اللى تزورنا وتصلى على النبى

مفارقات فى حياتى

ألو
ايوة انسه ....
لا يا فندم النمرة غلط
طب حضرتك مين
حضرتك نمرتك غلط في إيه تاني؟
طب انتي منين

......

وهكذا كان يوم حافل بالإدعاءات السخيفة والمحاولات المخزية من الحياة ، الحياة التي هي عند البعض رنه ..وتعارف..وممارسة أي نوع من الرزيلة المتوارية .

يوم دخل في حسابات أيام صَعُب علي أن أحياها أو حتى أحصيها ، ممل ..متكرر ..شديد الاعتراضات المبهمة الغبية ، تحدث تلك المفارقات في حياتي على المدى البعيد القريب ، يوم أو يومين – إذا ما كان مرور اليوم يعتبر زمناً!!!

المفارقة الأولي

نمت متأخرة – كعادتي- إلا أن طيف ما كان يداعب جفوني ، إنها رقة الأرق ..الذي يجعلك في حلم يقظى متثائب ، غفوت على نسمة صيف كنت افتقدها حتى أزعجني صوت يجاهر بالرحيل مبكرا ...واستسلمت

المفارقة الثانية

أن ياستهويك إحساس بحرارة أشعة الشمس الحارقة فتسير غير مبالي بحالك أو لسيول العرق التي غمرت جبهتك ، تخرج منديلا ..تمسح وجهك ، تسير في نشوة ، تشعر بدوار ..تسقط مغشيا عليك !!

هذا ..وقد يصنع مفارقة ثالثه عندما تركب البحر في محاوله لتعويض شيئا من الخيال حيناً ومن الرومانسية أيضا حتى وان كانت فردية ، هنا قد تعيش مع حلم يشتق جذوره من موج البحر وطيور النورس ، وتلك النظرة العاشقة التي تعيش معها في عالم وزمن وحياة ، قد تكون مستقبل أو ماضي بعيد ، هي الآن تجسدت بعد أن كانت حلما ، فقط لمدة قد تأخذ من الزمن الكثير وقد تحسب بعقارب ملتوية ، وتنتهي المفارقة دون أن اعرف لصاحب النظرة اسم أو التمس منه لقاء جديد
أنها مفارقات في حياتي ، تصنع اليأس تارة وسوء الحظ دائما..

منى واحمد ...ومحطة القطر ..1

بحركه تدل على رومانسيتها ، وهى تلقى بطرف طرحتها فى زوم قريب لوجهها الرقيق وزمن قد يتجاوز الخمس دقائق لتخرج منى من سيارة التاكسي

السائق: متيلا يا ست إنتي هتاخدى اليوم كله تنزلى من التاكسى
منى : احم ...هى دى محطة مصر؟
سائق التاكسى متجهم : ايوة يا أبله ..الأجرة خمشاشر جنيه خلينا نمشى

منى : ليه يا اخويا ..احم ثانيه اطلع الفلوس

واحده معديه : خلي بالك يا بنتشى ..السرقه هنا كتير ..ربنا يسترك

السائق: متيلا يا ابله ..عايزين نمشى من الحته الزحمه دى

منى ونظرة رومانسيه دامعه فى عينها : حاضر يا استاذ اسطى ...بس اصلى مش لاقيه البوك

السائق ( ينفخ ) : يا فتاح يا عليم ...يا ابله دورى واستهدى بالله هى مش ناقصه

منى بنظرة حائره : اعمل ايه بس ...اتلخبطتش يا ربى
أحد المارة : لا حول ولا قوة الا بالله ...هما مش هيبطلوا بقى ..إتقوا الله ..البسوا الحجاب
منى ونظرة أمل ونجده : لقيتوا الحمد لله ..اتفضل يا اسطــ
ومع نهاية كلماتها ..وكلمح البصر ...ضاع البوك
منى : سرقوووووووونىىىىى .......حررررررررررررامىىىىىىى

*****************************

أحمد : يلا يا سناء ...انا مش عارف لزمتها ايه السفريه دى وانتى تعبانه كده
سناء وهى تجذب صقف مقعد السيارة : يا احمد اسكت والنبى ..عايزة اكون جمب امى وانا بولد ..اسكت بقى احسن المغص اشتغل
احمد ( يتصبب عرقا ) : مش قولتلك متكليش محشى ؟؟وطفاستك يعنى لازم تاكلى الحله كلها
سناء ونسيان المغص مع 111 عجيبه : هو انت عشان الست امك اللى عملت المحشى ..آه يانى ..هتزلنى بالصوباعيين التلاته اللى اكلتهم
السائق يتدخل : هما كل الستات كده يا بيه ...وأل ايه عايزة تولد عند امها ...وأدفع انت ..إسألنى انا مجرب
سناء وعينيها تشتعل شرار: وأنت ايش اخششك ....عجبك كده يا استاذ احمد
احمد وبدأت عليه علامات الغضب والخوف فى نفس الوقت : متسكت ياسطى ...( وبصوت ضعيف ) هاودنى مش هتخلص
السائق فى تراجع : على ايه يا بيه ...الطيب احسن
سناء مقاطعه : آآآآه الحقنى يا احمد...
احمد: ايه يا سناء مش وقته ...ده انتى لسه فى الخامس
سناء : خامس ايه يا راجل ...انا فى السابع ...الحقينى يامه
السائق ( محشورا بخوف ) : إلحق يا استاذ ...احسن تولد فى التاكسى
احمد : متخليك فى حالك بقى ...انا ناقصك انت التانى
سناء : آآآآآآآآآه ..........الحقيييييييييينى ياااااااااااااامه

*******************************

جلست منى امام دورات المياة فى المحطه ....تمسك بورقة كبيرة مكتوب عليها : ســرقونى ياماما ...محفظتــى البيـج الجلـد ...ساعدونـى..إهئ إهئ

أحدهم : معلش يا بنتى ...خدى الجنيه ده
منى : إهئ إهئ..ميغسي
إحداهن : يا عينى ...شوفتى يا نونه ..ودي يا ترى هتعرف تروّح
نونه: مش عارفه بقى ...واحنا مالنا ..شوفتى عادل عمل ايه امبارح معايا !!!
منى والدمع يتقطر من عينيها : حبيته سنين طوال ..إهئ إهئ ...واليه القلب مال ..عااااااااا..وحلمت يكون معايا ...لو مهما العمر طال
تؤ ياربى مش دى الغنوة ...هتعملى ايه دلوأت يا مون مون ..المشكلة الكبرى ان الريحه هنا ياي ..مش عارفه اقعد بس عمو الشيخ اللى قالى اقعد هنا
الشيخ ( فى سره ) : البت دى لو فضلت معايا كده نشحت هنكسب فلوس بالهبل
منى : عمو ...احنا كملنا حق التذكرة؟
الشحات : لسه يا بنتى الصبر ...ربنا يخلى المحسنين
منى فى سرها : لو كان احمد هنا مكنش سابنى فى الموكف ده ابدا ..إهئ إهئ ..أينعم هو سايبنى من خمس سنين وقالى متصلش بيه تانى بس انا عارفه انه شهم وحونين
شاب متأمر : متيجى يا موزة اشربك حاجه اسفره ..ونلعب بينج بونج سوا فى المول
منى : ميكش دحوة بيا ..انا مش هيود عليك ..يا سيم
نفس الشاب : حلاوتك يألدغ
منى : انا مش لادغه دى اللبانه ...يا استاذ
هوه هواه الشاب : يا عينى على ادبك ياابيض
منى بقرف : خلاص الناس بقت سفيقه اوى كده ...اوف
ست اتحشرت فى الحوار : شوف البت ...متتلمى يا بت وبطلى معاكسه فى ولاد الناس ..انا عارفاكو يا بتوع تربيه نوعيه يا رقصات
منى : يا تنت انا مش فى تربيه نوعيه ...انا محفظتى البيج الجلد اتسرقت
الست الحشريه : لا بقى تربيه نوعيه ...مانا ابنى كان عايز يتجوز واحده منهم بس انا فقساكم
منى : يا تنت ..حرام بقى عاوزة اروح ..إهئ إهئ ..وكمان انا مالى ومال ابن حضيتك
الشاب الرخم : ها يا موزة اخلصى ورايا غيرك
الست الحشريه : جتك ضاربه هو انت مش شايف غيرها ..البعيد اتعمى
منى : شنطتى ...هدومى ...عمو الشيخ سرقنى ...وسعى يا وليه من قدامى انتى والدهول ده ...انا جايه الفيلم ده اتسرق بس
الشاب الغبى : انتى رايحه فين
منى : يا شيخ اتلهى ...

*****************************
سناء : احمد ...عايزة ادخل الحمام
احمد : سناء ...أبوس ايدك ..عايزين نلحق القطر ...السواق مستحملناش وانتى لسه داخله الحمام اساسا ...وبطلى اكل بسكوت
سناء: اه يانى يامه ...سيبتينى للراجل ده ليه ...لو موت يبقى بذنبك ...مش مسمحاك
احمد : مدّى يا سناء بدل ودينى ..أموت نفسى واقول انك قتلتينى
سناء : وتقول ازاى وانت ميت فهمنى كده ...آه المغص
احمد : ام التمثيل
سناء : يعنى خلاص حفظتنى ...ماشى ..لما اروح لامى
احمد : هسيبك عند امك ...أقولك ، غورى وانتيــ...
سناء : خصيمك النبى يابو نسمه متقولها ..صلى على الحبيب واهدى
احمد : اللهم صلى عليك يا نبى ...مدّى طيب
سناء : حاضر يابو الغالى
احمد يشاور وقد تعذر عليه الشوف : اهى المحطه اهى...الحمد لله

كان حتت يوم !!

المشكلة انى ركبت تاكسى ..والخطه اللى كنت انا وضعاها باظت خالص حتى الكساتا يا ربى حتى الجيلاتى (بتعطيش الجيم ) حتى التلاتينى والداير كل دول راحوا ..إهئ إهئ ..يلا موش مشكلة ، المهم انه كان يوم مممممم مش عارفه كل اللى اعرفه انى روّحت واقعه من الضحك مبسوطه قوى متجددة زى مبيقولوا ، حسيت ان عقلى اشتغل جامد قوى خالص ..مهو الواحد لما يكلم فى كذا موضوع مهمين ورا بعض ده شغل عالى قوى من اللى هو شبه القهوة البرازيلى ...آآآه نفسى فى شوية قهوة تمام حسه ان عقلى بيروح، بس على مين دنا كنت قاعده حتت قعده

احكيلكم من الاول ، اول مروحت شوفت ناس من بعيد كده كان باين يعنى انهم مدونين ولون يعنى معرفتهمش فكاكه بردو لا تؤتؤتؤتؤ كان فيهم واحده اعرفها ، ايه؟ لا طبعا مش هقول ...المهم عرفت الناس وقعدنا نتكلم شوية جه بعدها ابو خالد المدون الحلو ده وكله بيقوله بابا وبصراحه يستحق الكلمه، كان معاه مدونين القاهره آبى مدونتها كوكب آبى و رودى بنوته مصريه و داليا أس اتنين صاحبة مدونة قوس قزح واللى كانت فعلا متواجده فى بورسعيد و احمد سو و خالد همس الاحباب و احمد سكر..أما المدونين البورسعيديه فكان انا بلا فخر وداليا اهو ده عيبه واختها دعاء ربع ضارب والاستاذ طارق الغنام ومحمد كراكيب شيكو وطبعا الأب الجميل ابو خالد غير كده واحنا قاعدين فى امانة الله لقينا بنت سكره واختها جايين كده بتقولنا هو انتوا اللى تبع الاجتماع؟ قولنالها اه قالت انا صاحبة مدونة اوتار وبعلق بأسم نهر الحب فرحنا بيها قوى وطلع اسمها إيناس بجد محسيناش ابدا ان دى اول مره نشوف بعض

شيلنا العدّه ومشينا

واللى حصل بقى ان المكان كان مخنوق ومكناش مستريحيين ابدا فيه ، قولنا خلاص نقوم نقعد فى اى كافيه على البحر ، ولأن صدف وكان يوم عيد ميلاد المدون خالد همس الاحباب ( كل سنة وانت طيب تانى يا خالد ) فقولنا نقعد فى مكان منطلق كده ،وفعلا مشينا طوابير طوابير وكل واحد ماسك ودن التانى وهاتك يا رغى ، وانا انكجشت فى آبى ويا عينى نسيت اللاب توب بتاعها وجرررررررررريت عشان تجيبه مسطوله يا بنتشى ، بصراحه لما قعدنا كانت فعلا القعده تفرق كتير وطبعا ماما رودى وماما داليا اشتغلوا فى تقطيع التورته وتجهيز اطباق وحطينا الاطباق وقعدوا بردو يتكلموا ..يا جماعه كلوا ...مفيش ..يا بشمهندزين ...دودودودودو شغالين رغى ..اضطرينا بقى نأكلهم بالعافيه ونمسك كل واحد وواحده طبقه فى ايده ، بعدها اشتغلوا تصوير وربنا يسامحهم اللى صورونى ..عارفين لو شوفت صورة هقطعكم

سكوووت ...هنصور ونشيش كمان

البشمهندز احمد سووو عملنا حتت فيلم ، مش عارفه والله اوصفه ازاى ، بس بلاش اوصف احسن تكونوا بتقرفوا ( هاااا فاهمنى طبعا انت وآبى ) بس فعلا اثبت واظهر موهبته فى فن الاخراج المصرعى والمشكلة انه مصورنا واحنا بناكل يعنى مناخير ضاربه وبق مفتوح ( ياللهول ) ، المشكلة ان انا كنت قاعده جمب سو وسو طلع حريقة سجاير هو يشرب وانا اتسطل هو يشرب وانا اتسطل المشكلة الاكثر عمقا انه ابتدى يشرب شيشه وبردو هو يشرب وانا اتسطل لحد مقولتله خصيمك النبى يا شيخ لتبطل احسن انا خلاص عملت دماغ كورة ارضيه مش هتطلع ابدا المهم انه بعد السطلان ده كله طلع كولوريتس بتاعت ريحة البق دى وانا قولتله هات واخدت كبشه ولسه بحط واحده فى بقى حسيت انى هنفجر وتقريبا بردو فيها سطلان ، سو يا ساطلنا

كلام ...و كلام

اتكلمنا فى موضوعات كتيره جدا سواء فى عالم التدوين او خارجه ، إيناس نهر الحب او صاحبة مدونة اوتار بسم الله مشاء الله عليها متحدثه جيدة ولبقه مطلعه على حاجات كتير بتضحك وتهزر وتتكلم ولون انا اختلفت معاها فى اخر اللقاء على حاجه كده بس اظن انى اكتسبت صديقة جميله ، ورودى بنوته مصرية اكلمنا فى اكثر من موضوع يخص التدوين ليها عقل كده راجح ورغم خفة دمها اللى متوصفش حسيت انها رزينه ..ربنا يخليلك نور يارب ، والبت اللى اسمها آبى دى حتت سكرة على رأى ايناس تشوفى فيها البنت المصرية الجدعه اللى بجد موصفلكمش كمية الضحك والهزار اللى هزرناه ، داليا اهو ده عيبه صديكتشى وحبيبتشى ومعايا فى الازمات واختها بجد حبيتها كأنى اعرفها من زمان وكأنهم اخواتى ...وانا ناويه بأذن الله اروحلهم بعثه احسن انا اتخنقت بس شوية ، حسيت ان بابا ابو خالد هو اللى ماسك زمام الامور بجد حسيت ويمكن الجميع حس اننا قاعدين فى حما بابا ربنا يخليه لينا يارب ويحفظه ويكرمه ، داليا قوس قزح حسيت انها نسمه حتى صوتها كان واطى وهادى .. ولا يمكن عشان انا كنت نعكوشه وعماله ارغى واعلى صوتى؟ كانت فعلا قعدة جميلة قوى كأنك قاعد مع اسرتك ، خالد همس الاحباب واحمد سكر حسيت انهم هاديين كانوا بيكلموا معانا برزانه وعقل محصلش بجد ربنا يحميكم ، احمد سو بقى خبير السينما العربيه اكلم شوية عن افلام بعينها وهو بيرد على ايناس بردو فى فيلم بعينه ...والصغنون بقى محمد شيكو كان عامل زى فرقع لوز لا عارف يقعد ولا يقف ..ومعقد كمان وهو صغير كده وعمال يقول مش هجوز مش هجوز ، تصدق يا عم انا خايفه الاقيك جاى تقولى باركيلى ..بجد رغم ان كلامنا كان قليل بس حسيت انه حد عقله كبير

يلا سلام

للاسف الوقت مر بسرعه واهل القاهرة اضطروا يمشوا على الساعه 9 ونص وكنا نفسنا يقعدوا اكتر بس كان لسه قدامهم سفر ودعناهم وعلى امل زيارات تانيه زى موعدتنى آبى ، اما احنا بقى ففضلنا قاعدين والوقت فعلا سرقنا لانى بسأل شيكو هى الساعه كام قالى 11 ، بجد علما قمنا كانت حصلت 11 ونص مشينا احنا البنات وسيبنا بابا ابو خالد والاستاذ طارق الغنام ومحمد شيكو ووصلنا ايناس واختها ومشيت انا وداليا ودعاء ...وتهييسه من كولوريتس بتاع احمد سو ، يا سو يا جامد ..وللاسف خلص اليوم

بتمنى اننا نتقابل تانى بجد وزى مقولت على الاقل يكون كل اسبوعيين وخصوصا البنات ، بجد يوم ميتعوضش

لخبطيشن ...كُل واُشكُر

فاصل بفلوس

وصلنى دعوة من الشخص الجميل قوى والاب الروحى للمدونين ابو خالد بما انى من ابناء الوطن العربى الديمقراطى البورسعيدى السمكى المتحد لحضور ضمّه خاصه بالبورسعيديه يوم الخميس فى مركز شباب الاستاد اللى عند البحر ده اللى هو وانت راكب التلاتينى تلاقيه على طول الشارع على ايدك الشمال ووانت راكب الداير تلاقيه على يدك الشمال بردو من غير شارع

ولما تعدى الشارع بقى تلاقى معصرة سلسبيلا وهناك تاكل احلى كساتا واحلى جيلاتى - بتعطيش الجيم -

المهم انى مش بعمل اعلان للشارع ولا للمعصرة انا بعمل اعلان للضمّه دى ...هنتقابل هوناك الساعه السابعه بتوقيت بورسعيد وانا قولت للبت عيلّه انى نفسى ومونى عينى انى اروح بسى لما نشوف نصيبنا وياريت يعنى من كل المدونين الافاضيل انهم يجوا لو يقدروا واللى مش هيقدر هنجيب له جيلاتى من عند سلسبيلا ....وطبعا المدونين البورسعيديه لازمن يحضروا مفيش كلام واهو اللى مش هيجى ...

العدل فى الشيشه ايه؟ ....

ايوة ، مهو انا بقيت اتأقلم على الحياة دى يا اوختشى معتش ينفع الوش المقلوب والاحمرار والاصفيرار اللى كنتى بتعمليه ، زومان لما كنت ادخل كافيه من اللى هما خمشاشر نجمه دول واشوف واحده مأنتخه كده وبتشيش كنت بتلون وبعمل فيها عنتر ابن مشداد والساعه بخمسه نيه

وبقرف واقعد اتناقش واتعصب لكن دلوقتشى مبقاش يفرق ، مانا ديك النهار ماشيه فى شارع طويل كده كان فى اخره قهوة بلدى من اللى شكلهم شبه اللى لامؤاخذه مخانات لقيت ايه بسم النبى حارسهم وصاينهم اتنين شتات مش ستات هاتك يا شد انفاس ورغى ولا كأنك قاعدين فى البيت قدام التلافزيون

تنحت .....اتهطلت ....اتعبطت ....بس كل ده اثر يعنى؟ واهى بقت كوسه ...مش عايزين مساواة ...روحى بقى اتنيلى انتى وهى ..ايوة يالى بتنادوا انتوا بالمساواة وحقوق المرأة ...وشوفى اللى بتقولى عليها مش عارفه تطلع بطاقه واخده حقها وبالدراع ..بصوا انا مبقولش كده لانى كارهه اللى الناس دى بتعمله تؤتؤتؤ ..انا بقول كده عشان لما ناديتوا بالكلام ده الرجاله فهموا ان الستات هتاخد حقوقهم والستات بقوا نوعين اللى فهمت الموضوع على انه لازم تخرج عن جلبيتها وتعمل اللى متعملش ...او انها فعلا مظلومه ...ياريت نرجع زى زمان لما كان الراجل يقف زنهار لما يشوف ست ...ولا لما كان يخطبها ويجوزها وهو مشفهاش ...اهو انا عايزة منك ...

هو اتنين فى تلاته بكام ؟!!!

فى البوست اللى فات سابلى الاخ الصديق محمد داوود تعليق جميل قوى فيما معناه ان لو كل واحده رضيت تخلى جزها يجوز عليها مش لعيب فيها ولكن للتضحيه من اجل وقف نزيف الدماء ...ايه الكلام ده لا اقصد من اجل الحد من مشكلة العنوسه ، وبردو كل واحده ضحت وهى بنت بنوت زى القمر ..او البقر ميفرقش واجوزت واحد مجوز عليها يبقى المشكلة كده انتهت

طيب ممكن نرجع للآية الكريمه اللى بتقول ...

بسم الله الرحمن الرحيم

{{ وَإِنْ خِفْتُمْ أَلاَّ تُقْسِطُواْ فِي الْيَتَامَى فَانكِحُواْ مَا طَابَ لَكُم مِّنَ النِّسَاء مَثْنَى وَثُلاَثَ وَرُبَاعَ فَإِنْ خِفْتُمْ أَلاَّ تَعْدِلُواْ فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلاَّ تَعُولُواْ }}

دى الآية الكريمه اللى حللت للزوج الزواج بأكثر من واحده ..صح الكلام ؟ طيب انا بما انى انسانه بسيطه وغير مجتهده فى امور الدين او غير عالمه وطبعا ده عيب منى وانا بحاول انى اصلحه حد يشرحلى معنى الآيه وياريت كامله

ونيجى للجزء اللى انا فهماه وبنكلم فيه ، ربنا سبحانه وتعالى حلل الزواج للرجل بأكثر من واحده ليه؟

انا راجل مجوز وزوجتى مش بتخلف اعمل ايه؟

ربنا حللك هنا انك تتجوز غيرها برضاها

انا رجل شقى فى حياتى الزوجيه وزوجتى تعبانى جدا

ربنا حللك تتجوز برضاها وبما يرضيها من تعويض

بس فى شروط يا حضرات

ايه هى؟

انت تقدر تعدل ؟ مش بقول فلوس لالالالا تؤتؤتؤتؤ انا بقول فى كل حاجه يعنى فى يوم مزاجك عال كده وشوفت حتت عبايه مقولكش قولت اجبها لمراتى حبيبتى التانيه طيب والاولى؟ بس فلوسى خلصت ، اصلى مش رايحلها ، وهى هتعرف منين

لا يا اخينا انت كده مش بتعدل وكده عليك وزر والله اعلم طبعا

العدل فى الحب والحنيه والاحساس وحب الاولاد والساعه والدقيقه اللى بتقضيها مع فلانه...وهو ده العدل

تانى حاجه بقى الإعاله ...هتقدر تعول اولاد الاتنين وتصرف عليهم اكل وشرب ولبس وخروج وفسح ومدارس ودروس خصوصيه وتقضية فرض الله الحج ؟ لو تقدر تعالى اجوزنى يا عم بجد لو فيك الشروط دى

اة واول شرط رضى الزوجه الاولى وتعوضها

وبالمناسبه عندنا هنا فى مصر فى البدو خصوصا بيعملوا ايه بيعملوا حاجه اسمها تراضى

يعنى ايه؟ يعنى بيراضوا الزوجه الاولى بمبلغ يحكم بيه رجل كبير ذو عقل فى قبيلتهم ...وهو ده المقصود

ومعلش دى نبذة بسيطه عن الموضوع وهكمله فى لقاء اخر قريبا بأذن الله

عشان النوم جالى ومش شايفه ولا حرف

اتمسوا بالخير واستغطوا كويس ...واقفل التكييف يابنى هتاخدوا برد

عنوسه ننوسه >>بت للبيع

بيكييييييييييييييا.....رووووووبابيييييييييكيا......حــــدش عايــز بـــت قديمممممممممه للبييييييييييييع

ده....هيكون شعار موكع الجـــواز اللى هفتحه قريب ده هيكون شعار موكع الجواز اللى هفتحه قريب طبعا ده بعد مشورة ستات وبنات الحته المعونسين

مستغربين ليه ؟ ايوة بقول الكلمه وش كده وبلاش شغل البط والوز والنعااااااااام وانا موش هستنى لما وزير التومين يوزع مع الزيت والسكر كيسين عوانس ، لا لازم اوضع حد لده

وفى ظل قعدتى التفكيريه قدام المسلسل العربى الجديد ، قولت اعمل الموكع ونكسب وبالمرة اجوز البنات وزيتنا يبقى فى عيشنا واهو العيش فيه ازمه -مفيش حاجه مفهاش ازمه فى البلدتشى- وبعد مقريت اخر احصائيه اتخضتشيت الصوراحه احنا بقينا اكتر من المكروباظات وانا اللى كنت فاكره لسه فيه امل اتارى حنان راحت من زومان - بايخه دى -

نرجع لموضوعنا ، العبكريه فى فكرة الموكع وبما انى مفتريه زى مانتوا عارفين فعليه قررت يكون اول "مان " يزجل فى الموكع هحجزة ليا - مانا تبع الفريق - بعد كده بنود الموكع تنس على ان اول مالراجل من دول يسجل يبقى كده ضمنا الجوازة وقفشناه من الزعطلون - عجبته بقى معجبتوش ادينا بنصرف - وبكده فقد قامت المدلله والخاطبه الالكترونيه خالتك مفتريه هانم طعميه بتتتتتتتتتتتزويج بناااااااااات حاااااااارتنا وزغروووووووووودة حلوةةةةةةةةةةةة

عيلّه: ايه اللى بتعمليه ده ؟؟؟!!!!

مفتريه: اهو من زهقتنا يا اوختشى

عيلّه:انتى هتنزّلى الكلام الفارغ ده فى البلوج ؟!!!

مفتريه: يا بنتشى مهى مشكلة كوميه فى الوتن العربى كووووولوه

عيلّه: إذن ........قشطه

مفتريه : كريم جانتيه عليكى قومى بقى هاتى كوبايتين قهوة نمزمز فيهم عشان اكتب بمزاج

ونبتدى منين الحكايه....

عيلّه: انتى ليه متناقضه؟

مفتريه: يعنى انتى مش عارفه ليه؟

عيلّه: يا فوفه ازاى فيكى الطيب والمفترى ، ازاى فيكى الهاديه والنعكوشه ، ازاى حسه انك اتظلمتى كتير وفى نفس الوقت بتحاولى تظهرى انى كنتى قوية ومفتريه !!

مفتريه : وهو ده بس اللى لاحظتيه؟

عيلّه : لاحظت ...بس مستنياكى تقوليلى ، مستنياكى تعرفينى ازاى بتكونى كده بالتناقض ده

مفتريه : بصى يا لوله ، انتى عارفه اللى مرينا بيه ، فاكرة اول مخرجتى من الثانويه العامه ، فاكرة لما كنتى متعرفيش غير المذاكرة وماما بس ، فاكرة طيب لما اتغربتى لوحدك بشكل بنت ساذجه متعرفش حاجه فى الدنيا بطيبه غير عاديه بعبط يعنى

عيلّه: اة يا فوفه ...عارفه انى مريت بمراحله مكثفه غيرت شخصيتى بسرعه وفى حاجات كتير جدا ، بس تعرفى ساعات بفكر فى موضوع دراستى بره بلدى بشخصيتى دى اللى صادفت زيها معايا فى الدراسة وللاسف البنات دى مشت ورا حاجات كانت محرومه منها ومبهوره بيها وودتها لطريق دمار

مفتريه : عارفه يا لولو انتى محصلكيش زيهم ليه؟ لان انتى فى الاول كان اصل تربيتك وزرعتها طيبه ، كمان لان شخصيتك قوية بسرعه واعتمدت على تربيتك فى التفريق بين الصح والغلط ، تجربة غربتك علمتك القوه والمسئوليه والحكم على الامور دى بالذات بشكل ناضج

عيلّه : لكن بردو مكنتش بالقوة اللى اقدر اختار يا فوفه ، واختار ايه مستقبلى لأن ببساطه وزى كل مرة اتحكموا فى انى اغير مصار حياتى واضيع سنة من عمرى بدافع الخوف عليا وانى مكنش بنت مغتربه

مفتريه : وعارفه انك قبلتى او بمعنى اصح فرض عليكى بس يا عيلّه ده مقللش من ثقتك بنفسك بالعكس شخصيتك فى فتره قليله تبلورت وبقت ناضجه وفرقتى كتير عن بنات فى سنك

عيلّه:عارفه ..بس بردو لسة سؤالي ..اية اللى خلى جواكى كل المتناقضات دى؟

مفتريه: لان انا مريت بكل ده وبالى اكتر منه ، لانى مشتغلتش بالبكالريوس وجريت ورا مهنه حبتها ورغم انها مهنة المتاعب فكانت بالنسبالى حلم ...بس حلم متوقف

عيلّه : انتى اللى اخترتى ..

مفتريه:ههههههههه ...هتكذبى على نفسك؟ الاختيار عمره مكان ليا ...طب اسأليهم كده؟امتى كان الاختيار ليا وبالخصوص معلش فى بلدنا دى كان بين ايدينا؟

عيلّه: قصدك اية يا فوفه؟ انتى خلاص هتبقى انتحاريه ولا حاجه؟

مفتريه : قصدى ان بلدنا دى زى الغابه فيها الاسد - ملك الغابه- ودول هنا صنفين ياما فلوس او كرباج ، والرعيه بردو نوعين ياما ارانب اللى بتتاكل وتتعمل على ملوخيه ولو حتى جوه جحورها بتتاكل بردو والتعالب اللى بيمشوا بين السطور بين زقاق وزقاق ..اللى جواهم عايش ملاك لكن الافترا واجب ، صدقينى بقى واجب قومى

عيلّه : فوفه ، مكنتش اعرف انك حكيمه وعقلك نيور كده ، بس عكننتى على الناس واحنا هنا علشان نضحكهم

مفتريه : معلش مهى الدنيا كده يوم كده ويوم كده ، بقولك ايه تعالى نرمى- ماء تواليت- على غسيل ام احمد احسن امبارح ضربت الواد يوسف وانا بحب الواد ده قوى ومتغاظه منها

عيلّه : يلا بينا

كارابانتت!!

تحديث

انا صحيح نسيت اعرفكم بيا ، انا عيلّه الازدواج الثانى والانفصامى والطيب الهادى الرزين لفوفه (مفتريه ) ، هى سيبالى البلوج امانه
يعنى انا وفوفه واحد بس اتنين ، شخصيتين فى آن واحد (برت بلس )

جئتُ ..لا اعلمُ من أين ااااااااا...ولكنيِ أتايتُ وووووووو....

*********

آآآه يا فوفه ..زمانك دلوقتى بتبلبطى فى الميه ...بتبلبط؟!!!...دى الساعه اتناشر بليل يا عيلّه ..انتى خلاص عقلك ذهب من ساعة ممفترية راحت تصيف وسابتك

وسابتلك البلوج امانه فى رقابتك

مفتريه : بت انتى ..البلوك ده تنضفيه وتمسحيه وتكتبى فيه ...وتكلمى الزباين ..والبقشيش بالنص

عيلّه : بلوك اية بس ...ده فى الاميل يا فوفه

مفتريه : انتى هتعلمينى اتكلم ازاى ...اسمعى الكلام من الاخر وبطلى لك ..ده انتى لوكلوك خالص

عيلّه: حاضر يا فوفه ..بس ايه زباين دى ..هى كافى شوب ؟!!

مفتريه : بت انا راحه اصيف يومين فى كوم الطين ...هريح اعصابى من دوشتك ..ال كافى شوب ال ..هقلبها والله قهوة بلدى

عيلّه: خلاص يا فوفه متزعليش نفسك ..وايه كوم التين دى ؟

مفتريه : كوم الططططططططططططين ....ده مركز كارابانتت

عيلّه: مين يا فوفه ...كرابنتيت ده ؟!!

مفتريه : كرابنتيت ...اما صحيح جاهله ومتخلفه ...كارابانتت ..دى نقابه جديده هنفتحها للمفتريين سابقاً ..احنا تراث يا ماما ولازم يحافظوا عليه ..أمال انتى فاكره ايه

عيلّه: ....ومسمتوهاش نقابة ليه؟

مفتريه: لو فضلت ارغى معاكى يا بنتى مش هلحق الصيف اساسا وهروح هناك فى الشتا ...يلا سى يو ...وتيك كير على البلوك

جئتُ وووووو...لااااااا أعلمُ وووووو...من آآآآآآآآآين اااااااا...ولكنىِ ...أتيتُ وووووو

*********

فوفه يا فوفه وحشانى

ده كان اخر كلام قالته قبل متركب التوك توك بتاعها وتروح الكرابنتيت ..ياناس خايفه عليها شكلها راحه تبيع البلوك ..يييييييي البلوج

اصل انا سمعت اشاعات ان هيبقى فيه مخبرين على البلوجات ..بس دول كده وكده مش متخفيين يعنى

وال ايه بيناقشوا الحاجات دى فى المجلس

فوفه ارجعى بقى انا مشطبالك على الزباين كلهم اهو ...حتى اسأليهم

مش كدا يا اخونا ؟!!!

ملحوسه

بحب البت دى موووووز

الاول ...!!

انا :فاكرة يا بت يا مفتريه يوم مضربتى الواد احمد فى سنة خامسه اول ، لما كان بيعاكس البنات صحابك وانتى لأ

نفسى : يابنتى هو ده موقف ، طب استنى انا هفكرك بحتت موقف مش عارفه انتى فكراه ولأ بس كل لما افتكره اضحك من قلبى

ياربى على الافترا اللى كنت انا فيه

انا : ممممممم ...موقف ايه ده يابنتى ، موقف بنضحك عليه !!

نفسى : ايوة يا بنتى ..، طيب انا هحكى

انا : قولى ..

نفسى : كنت دايما احب امشى من شارع المدرسه اللى كله بيوت قديمه وحوليها جناين المكان ده كان مكانى المفضل رايحه من المدرسة وجايه من المدرسه ، وقتها كنت لسه طازة فى فريق الكراتيه فى النادى وعماله بقى اتشجع واضّرب على الحركات اللى علمهالى المستر ، وماشيه اقول فى عقل بالى صيحات بقى - هاااااع- والنبى مكان فى غيرها الصيحه دى ، المهم ياختى وانا ماشيه وعقل بالى شغال فى الحاجات دى الا واسمعلك صفاره وكلام شبه كلام المعكسات ده ، ابص حواليا الاقى تلات شباب من اللى مصدقوا شعر شنبهم ينبت وعاملين فيها رجاله وجايين الا ايه ..بيعاكسونى

انا : افتكرت يا بت مش ده اللى كســ

نفسى : اهمدى ياختى انا اللى بحكى

انا : طيب كملى ..

نفسى : وبعدين يا اخونا واحد وخدته الشجاعه وال ايه بيمد ايده عليا وبيعاكس بكل جرائه ،انا طبعا مستنتش للصدمه تاخد وقتها ، وبعيدا عن قاذف السباب اللى خرج من شفايفى الصغنونه (حلوة دى ) مطولطش غير ايده وبحركه بهلوانيه اتعلمتها من مستر الكراتيه بتاعى مع تنفيذ سليم ليها ..سمعت طقه - تييييك..تيييك- ودى كانت نهاية دراع الشاب الامور ده فى ايدى

انا : هههههههههههههههههههه ، الله يخربيت عقلك فكرتينى بحتت موقف كملى كملى هههههههههههههههههههههه

نفسى: طبعا انا سمعت التكه قومت رميت حتت العضمه - قصدى دراع الواد - من ايدى واللى نزل عليا اضحك انا والشباب اللى كانو واقفين يضحكوا عليه ويقولولى امشى يا بنتى هيجى يضربك ، وانا اضحك واقولهم ميقدرش ، واضطريت آسفه اسيبه يعيط على جمب - صُعب عليا -

انا : آه يا مفتريه ، بعد ده كله صعب عليكى؟

نفسى : علشان يعرف ان المعاكسه مضره بالصحه

انا : فاكره يا بت العلقه اللى اديتها للوله احمد بتاع خمسه اول

نفسى : ييييييييييييييييييييي، اسكتى بقى

إشمعنى انا ؟!!

جوايا كبت ...مانا لازم اخرج حاجات كتير على فكرة انا هنا علشان ابقى صريحه مش علشان امثل دور ملاك
انا مكبوته وعايزة اتكلم وحاولت كتير ومنفعتش قولت اعمل المدونة دى اعترض فيها مدام انا مش عارفه اعترض حتى فى حياتى كلها
ومش عارفه اعترض على حاجات كتير ...حتى لو كانت حاجات تخصنى ..وعلشان كده اسم المدونة جمله اعتراضيه ...اسمها ....اشمعنى انا ؟

انا: طب ليه اشمعنى انا؟

نفسى : علشان انا مريت باللى يخلينى اقول كده

انا: طب مانتى كده بتعترضى على قدرك ونصيبك واللى ربنا كتبهولك

نفسى : لا ...، انا بعترض على الظروف والامكانيات والاشخاص اللى بيجوا فى مواقف بتخلينى اعمل استوب واقول اشمعنى انا

انا : يا بنتى مهى هياها ده قدرك ونصيبك لازم ترضى بيه

نفسى : وليه محاولش اغيره ربنا ادالنا حيرة الاختيار ، وادانى عقلى اللى رافض وحاول كتير يصد كل ده

انا : طب هتتكلمى يعنى ؟

نفسى : مممممممممم ، انتى رأيك ايه؟

انا: مش بتقولى على نفسك عيله مفتريه سابقا ، طب اتفضلى بقى ورينا كنتى مفتريه ازاى

نفسى : حاضر اكيد هقول وهقول اكتر من كده يمكن احكى كمان على اللى هيقروا كلامى ده ..بس الصبر

انا : الصبر