الخميس، 9 أكتوبر 2008

عندما يأتى المساء

عندما يأتى المساء ..الناس كلها بتنام
عندما يأتى المساء ..ناديه بتضرب ابنها عشان يعمل الواجب
عندما يأتى المساء ..ام محمد بتاخد العيله عشان يزوروا نسايب ابنها
عندما يأتى المساء ..زينب هتنزل من بيت ستها تودى شهريتها لامها واخواتها البنات
عندما يأتى المساء..هيجى ابو العيال بأكلة كباب لزوم العَشَا
عندما يأتى المساء ..هيخرج إسماعيل كالعادة مطوح من الغُرزه
عندما يأتى المساء..هيقعد الحاج ابراهيم فى خلوته يصلى ويستغفر ويدعى لابنه بالتوبه وانه يخرج من السجن
عندما يأتى المساء ..هيزور عم جورج مرات احمد زى مهو متعود يزورها كل اسبوع بعد مجوزها استشهد فى غرق العبارة
عندما يأتى المساء..الست فاطمه هتودى طبق كحك وبسكوت لحبيبتها وجارتها ..ام مينا
عندما يأتى المساء.. دى ليلة العيد لازم اسامه يقضيها وياريت لو في موزه فى السريع عشان يلحق صلاة العيد
عندما يأتى المساء..هتروح نرمين هى وصحباتها فى الكليه دار الأيتام، وحشوها قوى من الاسبوع اللى فات
عندما يأتى المساء ..احمد بيفكر الساعه كام هيكلم منى عشان يقولها كل سنة وانتى طيبه ..يا حبيبتى
عندما يأتى المساء..سمير هياخد فلوس الذكاة اللى وعد امه يخرجها ويروح مكانه المفضل..يشرب وينسى
عندما يأتى المساء ..هتنام مريم وهى بتحلم ببابا نويل ..هيجبلها عروسه؟لا هى عايزة رجلين زى اللى كانت عندها !!
عندما يأتى المساء ..هتنزل منال بعد مالكل ينام عشان تقابل سيد ويهربوا سوا
عندما يأتى المساء..هتقعد الحاجه صبحيه مع بنات ولادها يتفرجوا على المسلسل ويقزقزوا لب
عندما يأتى المساء ..فرح محمد على مراته التالته بعد جوازتين وست بنات ..ويارب ولد
عندما يأتى المساء ..خرج عم فاروق يصلى العشاء بص قدامه لقى صاحب عمره بعد غياب عشرين سنه اخده بالحضن ..ومات
عندما يأتى المساء ..الاستاذ وليد هياخد مراته يوصلها بعربيته شغلها اصل شغلها متعوده دايما...يكون بليل
عندما يأتى المساء ..زى مخططت سماح ..هتخلص من جوزها وترتاح منه ..للأبد
عندما يأتى المساء ..هيرجع ابن سميه ليها بعد فراق سنين وقواضى ومحاكم ..يا ترى هيفتكرها؟
عندما يأتى المساء ..القمر هيطلع والسما هتبقى سواد وايناس فى الدور الاخير واقفه تبص للقمر وتقول : يا ترى لسه فاكرنى؟
عندما يأتى المساء .. كل البشر فى احوال ..وانا قاعده بكتب حال من مليون حال

عندما يأتى الصباح ..مدارس ومشاغل وبرودة وفطور وفول واشياء آخرى

هناك 19 تعليقًا:

صفا سارة يقول...

عندما يأتى المساء افتح مدونتك واقرأ الخليط المتميز من العبارات المرتبطة المنفصله فى نفس الوقت
:)

غير معرف يقول...

بجد تعبير رااائع
Queen Baby

د/ رامي شهاب الدين يقول...

لذيذة .. الفكرة جديدة

بس تعرفى لو كانت مسجوعة أو كنتى تكتبيها كقصيدة كانت هتبقى أروع وأروع

بس جميل أوى كوكتيل البشر ده هههههه

دمتى بكل خير .. تحياتى

Oss يقول...

عندما يأتى المساء (حوالى 12 كده)
-أسامه بيحاول ينام عشان المدرسه اللى عليه الصبح
-أسامه مش عارف ينام
-أسامه بيطلع كتاب أو روايه فى الخباثه ويقعد يقرا فيه
-أسامه بيتقفش وبيجبر على النوم

عااااااااااااااااااااااا
يعنى انتى جايبانى رايح اصلى العيد وساحب فى ايدى موزه
:(
ولا ده اوسس تانى

وبعدين احمد ومنى دول بتوعنا(اللى قعدنا ننم فيهم كام بوست)

حلوه الخاتمه

فى النهايه سامحيتنييييييييييييى
انا طلعان عينى فى الدراسه وعمايلها والمدرسه والدروس

وانا اللى كنت فاكر انى هلعب فى اولى ثانوي

اهئ اهئ

Unknown يقول...

بس احمد مش بيكلمني

ولا حاجة


اديني قاعدة مستنية

عندما ياتي المساء
ههههه
وحشتيني
يا
مفترية


سلام

م/ الحسيني لزومي يقول...

شارك في الحملة الشعبية للقيد بالجداول الانتخابية بوضع بنر الحملة علي مدونتك.
البنر موجود علي مدونتي

بنوتة يقول...

مممممممممممممممم
بحب الحاجات دي أنا وبحب الأسلوب دة
اهنيك على مدونتك
وأتمنى أشوف تعليقك في مدونتي قريب

Nostor Azzuro يقول...

كلام جميل جداً
وممكن من اسلوبك ينفع انك تكتبى شعر

Oss يقول...

ِشيماء
انت فين
وحشتينا بجد

عموماً كل سنه وانت طيبه

فاتيما يقول...

شيماء
كل سنة و إنتى بألف خير
عيد سعيد عليكى و على كل من تحبين
تحياتى و حبى

Eman Henaish يقول...

كل سنة وانتي طيبة

عيييييييييد سعييييييييد

انتي فين يا بنتي

ايه الغيبة دي كلهااااااا؟

غير معرف يقول...

عندما يأتي المساء أتصفح البلوجر
عندما يأتي المساء أعثر علي مدونتك
عندما يأتي المساء أعجب بها جدا و أنتمني ان اصبح صديقا لهذه المدونه الرائعه
تقبلي تحياتي

غير معرف يقول...

عندما يأتي المساء أتصفح البلوجر
عندما يأتي المساء أعثر علي مدونتك
عندما يأتي المساء أعجب بها جدا و أنتمني ان اصبح صديقا لهذه المدونه الرائعه
تقبلي تحياتي

الحقيقة المصرية يقول...

عاجل ويحتاج لتعليقاتكم (وقضيتى في الدفاع عن بلدي) اهم من الحكم الصادر وان كان قاسي http://elhakika.blogspot.com/2009/01/fpr0-iffpr1freeprhttpelhaqeqa.html

Moamen Reda يقول...

موم تااازة !!!

إيثار يقول...

و كمان عاشقة الحب
هتفضل تقاوح مع الدولاب
اللي متموت من الخوف لما تبصلوا
و في الاخر يهزمها
و تقوم مرعوبة بسرعة
و تجري برا الاوضة
لخايت الكمبيوتر
و القدر يخليها
تفتح مدونة اشمعنى انا ؟
اللي بتحبها اوي

تحياتي

ايمان مجدى يقول...

شيمو يا جميلة
مدونتك حلوة اوى واسلوبك احلى
ربنا يصلحلك الاحوال وتبقى الحياة احلى بكتير وان شاء الله عن قريب
تحياتى يا جميلة

حازم النبراوي يقول...

اسلوبك جميل جدا يا شيماء

الموضوع دة لو اتسجل بالصوت هيطلع حلو

تحبي تسجلية واذيعة عندى؟؟

لو محتاجة برنامج تسجيل كويس قوليلى وانا ابعتة لك

nabrawe@gmail.com

مع خالص تقديري واحترامي

spark يقول...

عندما يأتي المساء ....لا يحدث ا شئ