ازيكم ...وحشتونى قوى ..طبعا انا ظروفى لسه زى مهى لكن انا وسبحان الله جاتلى قوة وطاقه غريبه جدا على حالتى دى ..فعلا صدق اللى قالى من غير ميعاد ان خروجى من اللى انا فيه بأيدى انا ورغم انى لسه زى مانا ، بس حسيت بقوة الكتابه جوايا وحاجات كتير عايزة تخرج وعليه قررت انا المدعوة عيلة مفتريه سابقا ان انزل بتتر ..اقصد موضوعات هى ممكن تكون مقالات ساخره وممكن رغى بينى وبينكم فى السياسه - اللهم اكفينا شرها- بس الاكيد ان اسمها " ماشية مره " ، ودى اول حاجه تانى حاجه بقى حاجه كده ميتقالش عليها الا " حوار مع الحمار " ومسمعش اى تعليق
حوار مع الحمار هينزل كل اسبوع بأذن الله وبردو هو نوع من انواع الكتابه الساخره عشان بس منخبطش فى حد ونتعلق ولا كده لالالالا اما ماشيه مره فدى هتكون موجوده بحظوظها
كده المقدمه خلصت ....وعلى فكرة ملهاش دعوه نهائى باللى جاى ورا ...!!!!
................................
ازاى اكون راقيه ادبيا ؟؟!!! متعرفوش السؤال ده راودنى قد اية ..يمكن لانى لما فتحت عينى على نور الاوضه لقيت ان ده نور ربنا والفجر اذن من زمان ، يمكن لانى لما حاولت جاهده مستميته متشعلقه فى ميكروباز انى اعرف ازاى اكون راقيه ادبيا من اى حد من كبار الادباء والمثقفين والمعروفين دوليا على مستوى قصور الثقافه فى النجوع والمراكز والكفور وبردو مطلعتش منهم بإجابه واضحه وصريحه
واحكيلكم موقف
كنت فى يوم من الايام الصيفيه اللى كانت دايما تبقى مفعمه بالنشاط الثقافى ولان المثقفين فى جميع انحاء الاقاليم المصريه بيجتمعوا فى مؤتمر للادباء قولت اتشعبط على اول ميكروباظ واروح اتثقف واتعلم وانشكح وسطهم مهما بردو عزوتنا ، المهم طق فى دماغى السؤال
انا : احم احم ..استاذ معقد ممكن اعرف ازاى اكون راقيه ادبيا ؟
استاذ معقد : انتى يا انسه محتاجه على عمرك عمر تانى لتفهمى اساسا معنى سؤالك ده ..يا انسه انتى مش شايفه جبهزت الشعراء والمثقفين انتى لازم الاول تقفى وراهم وتسمعى لهم وتتعلمى يمكن تفهمى معنى سؤالك
انا بلاماضه :هو حضرتك يا فندم مينفعش الجيل الجميل ده يعلمنا بردو اهو يكسب فينا ثواب
استاذ معقد :سواب ايه يا انسه انتى ...وعلى العموم بعد الغذاء بأذن الله هقولك وطبعا الغدا جر عشا وانا فضلت استنى اجابه لسؤالى كيف ارتقى ادبيا ،بس طبعا انا مفضلتش ساكته على حالى كتير قولت مادام الكبار محتكرنها يبقى انا لازم بردو اشغل جمجمتى
وعليه - امسكوا ورقه وقلم - ونبدأ فى معرفة كيف ترتقى ادبيا
نمبر 1 ..كل اللى يقع تحت ايدك يا معلم تقراه ..متقوليش ده مبفهموش ..متقوليش ده لغة فارسى ..حاول تثقف نفسك وتمنجه نفسك انا مبهزرش لازم تكون عارف كل كبيرة وصغيره ولو مش عارف مَثل يا سيدى
نمبر 2 ..بأى شكل من الاشكال البس نضارة نظر ويا سلام بقى يا بوب لو تبقى كعب كبايه ..صدقنى هتوصل للارتقاء فى ثانيه
نمبر 3..تبقى ماشى فى الشارع يا معلم وايدك شايله ايشى جرايد وايشى كتب ..لازم تبين السقافه هيقولوا عليك علم من اعلام الجولوجيا صدقنى
نمبر 4..احنا طبعا فى شهر رمضان والناس بقى شغاله موائد رحمان ..سيادتك تنمر على مائدة الرحمن بتاعت اى اديب مشهور او كاتب وترشق فيها ولونهم قليلين يا حسره
نمبر 5 ..حاول على قد متقدر متسمعش ولا كلمه من كلامى ده ..لان كلامى ده هيخليك ....ولا بلاش هبقى اقولك فى حوار مع الحمار
هناك 9 تعليقات:
لا لا
انا عندي الحل
اكون راقي ادبيا
اني اكون اول واحد يرد هنا
------------------------
عوووووووووووود احمد
يارب كلنا يبقي عندنا القوه اللي نتغلب بيها علي اي حاجه مضايقانا
يااااااارب
كل رمضان وانتي اقوي باذن الله
متسنييييين جديدك ايا كان ياذن الله
ليكوريكا
هييييييييييييييييييييييييييييييه
مفتريه رجعيييييييييييييييييييييت
حمدالله بس يا باشا
وحوار الإرتقاء الأدبى ده جامد
وأنا اقول ليه انا عايز البس نظاره
:)
أه والله أنا نفسى البس نظاره مش عارف ليه
عبيط مش كده
يلا سلام
ايون هي دي مفترية اللي ما تقفش
قدامها مشاكل والكلام الفارغ ده
حمد الله علي السلامة
الحوار ده جاااااامد
بصي لترتقي ادبيا، لازم تكون واثق انك
تقدرترتقي ادبيا ، وأوعي تقف عند حد معين
خليك ديما عايز تكون أحسن وده هيدفعك
وهتعرف ازاي ترتقي ادبيا
حد فاهم جاجة؟
انا عن نافسي مش فاهمة :)
مستنيين البوستات الجايا
تحياتي
يا بوب عجبتنى اوى الكلمة دى
ما تكبرى الخط شوية ربنا يكرمك عوامل السن يا بنتى
وبعدين سقافة بالسين
اة منك انتى يا مثقفة
ههههههههههههههههههه
يا بنتى ثقافة مين على راى المثل العلم لا يكيل بالبتنجان
جميل قوى الكلام دة .. شوف ازاى يا اخى اكون راقى ادبيا
طااايب ..
حضرتك فكرتينى بالأديب اللى قال ( كل الظروف من حولى كانت تساعدنى على ان اصبح لصا .. غير ان الظروف سائت فأصبحت كاتبا )
بوست دمه خفيف .. كل عام وانتى بخير
تصدقى انا فضلت اربع سنين فى كليه الاداب قسم الغه العربيه وماعرفتش ازاى اكون راقيه ادبيا نوهاااااااائى
بس اقولك نصايحك جامده طحن
كل سنه وانتى طيبه
سبحان الله الناس كلها الشدائد بتهدها وتكسر روحها. انما العيله المفتريه بتفترى على المضايقات وهى اللى بتكسرها.
الحمد لله انا ابتديت فى كام خطوه كده من الكتالوج اللى انتى قدمتيه لكى تصبح اديبا. واهم حاجه ابتديت فيها انى لبست نضاره. ومن ساعة مل لبستها والحقيقه حاسس ان نظرة الناس ليا اتغيرت. بس ده يمكن لانى مش شايفهم كويس. ياريت تقوليلى على مكان واحد فى جمهورية مصر العربيه فيه اديب بيعمل مائدة الرحمن.....الله يرحمك يا توفيق الحكيم....حمدالله على السلامه ويارب يارب تكونى دايما بخير....فى انتظار حوار الحمار
كلام جميل وبوست جامد
شكرا ليكى
وتقبلى مرورى
سلام
السلام عليكم ورحمة الله وبركاتة
ازيك يا شيماء
حبيت اقولك كل عام وانتى بخير وعيد سعيد بأسمى مش غير معروف
عيد سعيد وان شاء الله دائما بخير وسعادة وحققة كل امانيك
اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد
اختك
نهر الحب
إرسال تعليق