عن أول مرة تحرش .. مشاعر لا تعرفونها

مش عارفه أكتب لُغه عربيه ، ومش عارفه أعمل حاجه انا متعودة أعملها عادي جداً ، مش لاقيه طرف الخيط اللى ابدأ منه كلامي ، لكن أنا هتكلم وخلاص ، أنا مش جاية أشرح معني التحرش ولا جاية أتكلم عن ليه بيتم التحرش بالمرأة ولا هقول كلام أكاديمي معقد محدش بيفكر فيه وقت حدوث فعل التحرش ، أنا مش هتكلم ، أنا يمكن هبوح بشوية مشاعر ॥

*أول مرة تعرضت للتحرش كان في سن عشر سنين ، متستغربوش يمكن مقومات جسمي كبنت في سن عشر سنين بتبين إن عمري ستاشر سنه ودة لأنى كنت تخينه نوعاً ما فكان تخني بيبين إني أكبر من سني ، ووقتها معلوماتي عن جسمي كانت إني بنت وإن أمي دايما بتحرّج عليا حد يلمسني لأنه ممنوع هو أنا مكنتش عارفه ممنوع ليه لكن كان ممنوع من ممنوعات الخرطوم والكرباج ، ركبت الميكروباص في رحلة عودتي من المدرسة ، لابسه ينيفورم المدرسة وكان وقتها لونه كُحلي زي مدارس الثانوي ، قعدت وقعد جنبي ، راجل شكلة كبير " عمو "

* لما حسيت بإيده علي فخدي ، كنت ببحلق في ضهر الكرسي اللى قدامى كأني بقول مش انا اللى بيحصلها كده ، أنا بيتهيألي ، كنت ببصله كأنى بقوله " عمو هو أنا عملت إيه عشان تخلي ماما تضربني !! كان بيبصلي بإستمتاع ، وأنا كنت بتكوم جوة نفسي بخوف

*مكنش معايا فلوس تسمح إني أنزل من الميكروباص عشان اركب حاجه تانيه ، ومكنش عندي الجراءة ولا القوة إني أتصرف أي تصرف دفاعي ، أنا كان الخوف ماليني لدرجة إني كنت ببكي جوة نفسي من غير دموع ، كنت برتعش وهو كان مستمتع بخوفي ॥

*أول منزلت مشيت ناحية البيت وانا بكتم في صوت دموعي ، وأنا واقفه ع الباب مسحت دموعي بسرعه ، ودخلت البيت مبتسمة كأن مفيش حاجه ، دخلت الحمام بكيت ببشاعة لسه فاكراها وخرجت بطلب من ربنا ماما متاخدش بالها من شكلي ، وإلا مصيري هيكون شئ مستحملوش

* مع أول قصة تحرش ليا إكتشفت إن تربيتنا من الأساس بتخوف البنت من جسمها ، وبتعلمها إن ممنوع عليها قبل غيرها ، لكن لما غيرها يحاول يقتنص اللى مش من حقه ॥ مش من حقها لا تدافع ولا تتكلم ولا تبوح ولا تصرخ ولا تشتكي ولا تعمل رد فعل ولا اي حاجه ، معندهاش حق اصلا

* مع أول قصة تحرش ليا إتبني عندي عقدة من كلمة " راجل " ، وعلي أثرها طلعت أجري واصرخ لما المقرئ حاول يطبطب عليا وهو بيقرأ قرآن في عزاء جدي

* مع أول قصة تحرش ليا عرفت أني كرهت جسمي فترة طويلللللة ويمكن لسه بكرهه لأنه بيجلب عليا الشر ، لاني مقدرش أحميه

* التحرش حاجه بنخاف نتكلم عنها زي الإغتصاب ، انا فعلا بخاف اقول ان تم التحرش بيا ، لأنى براقب نظرة الناس للمتحرش بيها بتكون مقسومه لحاجتين ॥ ياما صعبان عليها وحاسه بشفقه ناحيتها ॥ ياما بتتهمها !

* مقدرش أنكر ان في ستات كتير بتستخدم كلمة تحرش في غير موضعها عشان تحقق أغراض خاصة بيها ، ومقدرش أنكر ان في رجال بيتعرضوا للتحرش ، لكن بيفضل إحساس البنت بالعجز والنقص ملازمها ، وإحساس الرجل بالفخر

أنا مقدرش أقول إني اتغيرت كتير عشان كده بكتب الكلام دة ، ومتأكده إن الحل صعب ، لأن لازم ندخل كل بيت ونقنع كل امرأة ॥ إنه مش ذنبها ، نقنع كل واحدة تغير نظرتها للبنت اللى بتدافع عن نفسها ضد التحرش ومتقولش عليها قليلة الأدب والتربيه ، نقنع كل ام تفهم بنتها إن جسمها مش من الممنوعات وتحثها تدافع عن نفسها وتتكلم وتبوح ومتكبتش نفسها ، نقنع كل راجل إننا مش سبايا ولا محللين لمجرد - إنه شايف - إنها مش محتشمه من وجهة نظرة او مادام مهتمه بنفسها تبقي تستحق فعل التحرش ، نقنع كل راجل إن مش من حقه يجرح اي واحدة مهما كانت بالكلام لأن دة مش من حقه وتجني عليها ، لو نقدر نعمل كده - ودة أضعف الإيمان - يمكن في يوم نعيش اسوياء بدون أمراض وعقد نفسيه بيسببها ناس مبنقابلهمش إلا مرة واحدة بس ॥ وبيأذونا